إنسان جبان
كان ياما كان إنسان جبان
بيخاف يجوع ليبان جعان
بيخاف يقول كلمة وطن
يتحط بين أربع حيطان
ويخش سين وجيم ونون
بيخاف يكون أو لا يكون
بيخاف كمان
بيخاف يقول أنا منتشى فرحان سعيد
بيخاف حتى يبتسم لو من بعيد
ليقولوا ناسى قضيته
ناسى العراق ناسى الشيشان
ناسى فلسطين الأسيرة من زمان
بيخاف يبان
ليقولوا ظهر البهلوان
بيخاف سكوت بيخاف كلام
بيخاف يقوم بيخاف ينام
بيخاف يشوف منظر قبيح
بيخاف يكون إنسان صريح
إنسان جبان
"وف يوم من الأيام هنا العقدة،
ندهه الملك كان ملك أعظم من العمدة"*
قال يا جبان:
عاوز تكون أشجع شجاع
اجلس على الكرسى وامسك صولجان
علم رعيتك الرعاع
إزاى يكون أمرك مطاع
رفض الجبان
حبسوا الجبان
مات الجبان
وترك فى بلده ميت جبان
خطوها فى كتاب الزمان
عاش الجبان.. عاش الجبان
نوع العرضحال: شعر
