آسف يا جماعة إنى أخرت البوست ده عشان النت كان فاصل عندى وعشان مش قادر أعبر عن فرحتى باليوم ده كنت حاسس إنى فى حلم جميل مش عاوز أصحى منه وطبعا لظروف سفرى مشيت بدرى عشان الحق مواصلات بس ده ميمنعش إنى قابلت مدونين كان نفسى أشوفهم ومدونين مشفتهمش وان شاء الله أشوفهم الحفلة الجاية وزعلان قوى إن من ضمن العدد الكبير فى المكان والزحمة دى مقابلتش إلا 24 مدون فقط لاغير، طبعا أول واحد اتعرفت عليه بدون سابق معرفة هو مصطفى حمدان (مدونة هارد تايمز) على مكتوب وهو كان رفيقى فى الحفلة وبعد كده قابلت رضوى (مدونة دودا هانم) ومعاها مى بهاء (مدونة نصف دستة أفكار) - رفيقة الشعر- وأشرف توفيق (مدونة أخف دم) بلدياتى من المنصورة ومن لبنان (مدونة ليالى بيروت) و (مدونة شهر زاد) وإنجى (سمراء النيل) ومحمد مفيد (مدونة فى الصميم) وشمس الدين (مدونة ربة السيف والقلم) وأسامة (مدونة بيتنا القديم) ومروة (مدونة لماضة) وتعليقاتها اللمضة ومصطفى ريان (مدونة شاب ثائر) وأحمد الصباغ (مدونة خالو أحمد الصباغ) وأحمد القاضى (مدونة يا مراكبى) اللى جه من السعودية مخصوص عشان يحضر الحفلة وسمعت كده اسم بيتقال فى الزحمة والدنا كلنا أبو خالد (مدونة أبو خالد) فعلا أتشرف إنه يكون والدى رغم اللقاء القصير وأحمد سلامة (مدونة مستر كوفى) وأستاذنا أحمد رفعت (مدونة قضية عم أحمد) وعمنا أحمد (مدونة يوميات عيل مصرى) ورشا (مدونة مكان فى القلب) وإيناس لطفى (مدونة عايزة أتكلم) وطبعا أصحاب الفكرة أحمد البوهى وأحمد مهنى (مدونة أنا وصاحبى) وطبعا عرفت بعد كده من تغطية أحمد الصباغ آبى (مدونة كوكب آبى) من صورتها وشفتها بس معرفتش اكلمها وأتعرف على إسلام خطيبها أكيد ثنائى يجنن وربنا يباركلهم وكمان مانساش ضياء (مدونة belong 2 za humanity) وكمان الوجه البشوش اللى يشبه الملكات أميرة الشربينى (مدونة حكايات فريدة) وبعد كل هذا التمحيص والتدقيق أعتقد إنى منسيتش حد من الناس الحلوة اللى شفتهم وكان نفسى أشوف كل الناس بس تتعوض الحفلة الجاية وفى مكان أوسع حبتين ويكون المجال أفضل للتعارف . بصراحة يوم مميز جدا برغم المشادة الكلامية اللى حصلت بين المدعو ماجد فرج وأحمد مهنى بس أكيد فيه ناس هما أعداء النجاح بيفسدوا فرحة الناس وبجد فكرة جميلة جدا ويا رب يكتب لها النجاح وتكون سلسلة ناجحة زى روايات مصرية للجيب كده. وآخر كلامى سلام لكل اللى حضروا وكان ليهم أعمال فى الكتاب، ولكل اللى حضروا وملهمش أعمال فى الكتاب، وكل اللى حضروا ومش مدونين وكل اللى محضروش ليهم منى ألف سلام.. وبجد يوم من عمرى.
بارك الله فيك
وربنا يهدي أعداء النجاح
شكرا على الزيارة واول تعليق يا عصفور المدينة وكان نفسى نتقابل بس تتعوض المرة الجاية ان شاء الله
تحياتى
والله كانت حفلة جميلة بس انا ماشفتكش
الواحد لقى مشكلة كبيرة فى انة يتعرف على الناس ياريت المرة الجايه يعملوا حاجة تعرفنا ببعض انشا لله المدونين يحطوا بادجات بجد حيفرق كتير
تحياتى
اه ياااانى
كل لما ادخل على بلوج ولاقيه ناشر تفاصيل اليوم ده احقد عليهم
عشان مكنتش هناااااااك
يارب المره الجايه يراعوا ظروف الناس اللى بتيجى من المحافظات ويكون المعاد بدرى
وبعدين انت طلعت دقهلاوى بلديات
واذ فجأه مدونين الدقهليه ظهروا وبانوا
انا الكام شهر اللى فاتوا كنت بدور عليهم عشان نجمع كلنا ونعمل تجمع لمدونين الدقهليه
المره الاولى كنا اربعه بس
والتانيه كنا خمسه وكنا بنات بس
هى تقريبا المشكله ان معظم مدونين الدقهليه مش يعرفوا مدونات بعض
علىا لعموم تشرفنا يافندم
تحياتى لك
هي فكره جميله اوي فعلا يا ايمن , وان شاء الله الحلم ده يكبر ويكبر ويبقي انقلاب جديد في عالم الكتاب يحدثه المدونين من الشباب
اتمني لك التوفيق ولكل من ساهم في هذا الحلم الجميل
تحياتي
محمد
زى ما قولتلك كااان نفسى اوى ابقى موجودة
نقول ان شاء الله المرة الجاية تكو الظروف اجمل كماان
نورتنى
رئيسة حزب الأحلام
الزحمة سبب اساسى فى صعوبة التعارف بين المدونين اللى كانوا موجودين بس ملحوقة ولو ممكن تحضرى الخميس الجاى يوم 29/5
اتشرف بمعرفتك
تحياتى
====================================
رحيل
اهلا بالناس الدقهلاوية المأصلين وانا موجود علاطول ان شاء الله ومعاكى فى فكرتك عن تجمع المدونين
وشكرا على تشريفى بالزيارة
بس قبل ما انسى انتى منين من الدقهلية
تحياتى
===================================
الفارس الملثم
شكرا يا محمد على الزيارة ويا رب تكتمل السلسلة دى وتبقى خطوة فى تعديل مفهوم الثقافة فى مصر
سلام
==================================
دعاء مواجهات
كان نفسى اشوفك والله انتى وناس كتير من اللى بعزهم بس تتعوض ان شاء الله ولو قدرتى تيجى الخميس الجاى 29/5 يبقى اتشرف بمعرفتك
تحياتى
فعلاً يا ايمن كان يوم من عمري علي الرغم من الظروف القاسية اللي شفنها طبعاً انت عارف قصدي التكيف اللي كان فيه هههههههههههه بس كان يوم لذيذ بردو وكفاية الناس الجميلة اللي قبلنها هناك واشكرك يا صديقي كلامك الجميل واتمني نشوف عرضحالجي في الجزء التاني من مدونات مصريه للجيب
تحياتي لك
مبروك يا ايمن كان نفسى بجد اكون موجوده
بس ما نفعش بقى عشان السفر من المنصوره لهناك و المواعيد دايما بتبقى متأخره شويه
ان شاء الله المره الجايه بقى
بس ما تعرفش هل الكتاب موجود فى المنصوره و لا لأ
الف الف مبروك
سلام مؤقت
كان نفسى بجد نتعرف
بس ان شاء الله تتكرر فى مرات تانية
وفى ظروف مفيهاش زحمة ولا حر كده :)
تحياتى ليك
hard times
مصطفى عامل ايه شكرا على الزيارة واتمنى انى اشوف مصطفى حمدان فى كتاب مستقل يجمع كل ما كتب عشان تكتبلى عليه اهداء
تحياتى
====================================
نور
اهلا باهل المنصورة يا ريت ان شاء الله المرة الجاية تكونى معانا والكتاب مش فى المنصورة بس فى لقاء الخميس الجاى فى نفس المكان بالقاهرة عشان اللى مخدش نسخة وكمان عشان يتوقع له عليها
والكتاب مش موجود فى المنصورة
شكرا على الزيارة
==================================
اهو ده عيبه
ان شاء الله ياداليا يكون فى اللقاء الجاى تجنب للاخطاء اللى وقعت فى اللقاء الاول واهم حاجة يكون المكان اوسع ويبقى مفتح ومبهوق من كل ناحية عشان الحر
تحياتى
إزيك يا عم أيمن
كويس انك حضرت الحوار ده عشان ما كنتش الظروف عندي سامحه
سلام عليكم
ازيك يا جميل انا كنت هناك بردة
يمكن علشان الزحمة الرهيبة ماعرفناش نشوف بعض كويس
لكن الجايات احسن من الرايحات
ربنا يقدملنا الخير دايما
مبروك لكل المدونين يا ايمن وسلامه النت
سومه_87
سلامك للناس اللى محضروش وصل
وان شاء الله اللقاءات تتكرر كثيرا
وبالتوفيق دائما
الاتىربى اللولبى
ازيك يا حامد والله كان نفسى تكون معانا وتتعوض المرة الجاية
====================================
مصطفى ريان
فعلا المكان كان زحمة بس انا قابلتك ووقفت معاك انت ولماضة افتكر يا عم
شكرا على الزيارة واتمنى المتابعة
=====================================
سومة
شكرا على سؤالك يا سومة على صحة النت واطمنك انه دلوقتى الحمد لله عدى المرحلة الخطرة من المرض
شكرا على الزيارة
ملحوظة كل اما ادخل على مدونةتك (هايلة تعدل المايلة الاقى رسالة بتقول انى مش من القراء المسموح لهم بالدخول ايه المشكلة
تحياتى
==================================
موناليزا
ان شاء الله
وعلى فكرة احنا عاملين جروب دلوقتى على الفيس بوك عشان نجمع المدونين عامة ومدونى الدقهلية بوجه خاص عشان يبقى فيه لقاء فى المنصورة للتعارف ومبادلة الافكار
يا ريت تدخلى وتشتركى
تحياتى
تم كل هذا الكم من التعارف بدون اى دمغات وده تجاوز يحاسب عليه القانون
اسعدتنى
وحكون اسعد لو المره الجايه وقعتلى على العدد الجدبد
بجد انا اللى أتشرفت وانت اللى أستاذ كبير كمان ....
عايزين نتقابل تاني مش يبقى مرة واحده وخلاص زززز
دودا هانم
طبعا نفسى يكون فيه مدونة تهتم بجمع الضرائب من السادة المدونين لان ده حق البلد عليهم هما ياكلوا ويشربوا حاجة ببلاش كده
اما بالنسبة للتوقيع الشرف ليا انك توقعيلى الكتاب بس انتى اللى هتجيبيه من على الارض انا بقولك اهه
====================================
أحمد رفعت
سعدت جدا بالتعرف على مدونتك وسعدت اكتر بالتعرف عليك فى الحفلة وان شاء الله المرة الجاية اقعد معاك قعدة طويلة شوية
تحياتى
اولا
مبروك على الكتاب و الفكره
ثانيا
احنا فعلا لينا رابطه اسمها رابطه مدونى الدلتا فيها بنجتمع و بيحضر كتير من ابناء الدلتا من دمياط لحد رشيد كمان
اتمنى انك تحضر معانا
اللقاء بتاعنا لقاء حى
خد اللينك ده فيه كل تفاصيل الرابطه
http://kalaaam.blogspot.com/2007_12_01_archive.html#4524909259249336483
بعنوان ما تم الاتفاق عليه فى رابطه مدونى الدلتا
و اهلا بيك فى الرابطه و اهلا بيك صديق عزيز
سلامك وصل :)
واسم مدونتي عاملك زحمة في البوست :)
A Beautiful Mind
بسيطة يعني :))
ويا ريت اللقاء يتكرر تاني بس جمعة أو سبت عشان زحمة المواصلات
وانت اللي حلو :)
كان نفسي اتعرف عليك ليه مقولتش خفت من خرفاني صح قول اعترف هههههههههههه
محمد مارو
شكرا على الزيارة وان شاء الل نتعاون مع بعض
=====================================
ضياء
والله انت اجمل يا ضياء وفرصة سعيدة انى قابلتك وعلى فكرة اسمك مش عامل زحمة ولا حاجة
تحياتى
====================================
ابى وكوكبها المزعج
شرف ليا طبعا انى اتعرف عليكى وعلى خرفانك وكنت عاوز اشوف اسلام واقوله ياخد باله من خرفانك
انا شوفتك بس اتخنقت من انى كل شوية اروح لحد واقوله مدونة ايه والدنيا حر والناس مش طايقة نفسها كان ممكن يطردونى برة الكوكب خالص
ان شاء الله تتعوض المرة الجاية
السلام عليكم
عااااااااااااااااا
كان نفسي اتعرف عليكم انا والحاج
تتعوض باذن الله
تحياتي
ان شاء الله تتعوض المرة الجاية واتشرف بمعرفتكم
ماشفتش شاب بكرش كان لابس شيرت اورانج وبيريه وشايل بنوته صغيره - اللي هي خطيبتي يعني - وكان عرقان بطريقه بشعه من الساونا اللي كنا فيها؟؟؟
لو ماشوفتشو .. يبقى مش مشكله
ولو شفته .. ابقى سلملي عليه قوي
عشان ده احمد سوووو
صحيح انا ماعلقتش عندك قبل كده .. بس واضح ان في ناس مشتركه مابيننا وبين بعض
ان شاء الله المره الجايه نبقى نتعرف ببعض
افوتك بالعافيه
سلامووووووووز
طبعا يا باشا شفتك على السلم وانا كنت واقف مع اشرف توفيق وقتها اشرف سلم عليك وعرفك بنفسه وانا كنت لابس تى شيرت بيج بس بصراحة مكنتش عارف حد فتتعوض المرة الجاية ان شاء الله
سعدت بزيارتك واتمنى المتابعة والتواصل